Hot!

නවතම පුවත්

මත්තල ගුවන් තොටුපල ගැන කරන අසත්‍ය ප්‍රචාරවලට නොරැවටෙන්න - මහින්ද අමරවීර

මත්තල ගුවන් තොටුපල ගැන කරන අසත්‍ය ප්‍රචාරවලට නොරැවටෙන්න - මහින්ද අමරවීර

 

ජනතාව නොමග යැවීම සඳහා ඒකාබද්ධ විපක්ෂය විවිධ උත්සාහ දරන බවත් ඔවුන්ට අවශ්‍ය කෙසේ හෝ රජය පිළිබඳ ජනතාව තුළ අප්‍රසාදය ඇතිකිරීම බවත් ඇමතිවරයා වැඩිදුරටත් ප්‍රකාශ කරයි.

ගුවන් තොටුපල කිසිසේත් විකිණීමට රජය සූදානම් නැති බවත් එහි පරිපාලන කටයුතු විදෙස් රටකට පැවරීමට කටයුතු කරන්නේ නම් එය ද පාර්ලිමේන්තුව දැනුවත් කරන සිදුකරන බවත් අමරවීර මහතා සඳහන් කරයි.

හම්බන්තොට විරෝධතාවය සඳහා විශාල පිරිසක් සහභාගි වනු ඇති බවට ඒකාබද්ධ විපක්ෂය බලාපොරොත්තුවෙන් සිටියද ඉතා සීමිත පිරිසක් පමණක් සහභාගි වූයේ ජනතාව තවදුරටත් ඒකාබද්ධ විපක්ෂයේ බොරුවලට නොරැවටෙන නිසා බවද ඇමතිවරයා ප්‍රකාශ කරයි.

උපාලි සපරමාදු

ගිවිසුමේ හැටි එහෙම - වර්ණ රසිකා ගුණවර්ධන

ගිවිසුමේ හැටි එහෙම - වර්ණ රසිකා ගුණවර්ධන

 

"එපා වුනේ නැද්ද 
එක විදියටම ඉන්න එක 
නොහෙල්ලී,උඩුබැලි අතට 
ඇණ ගැසූ පෙට්ටියක."

"හොඳම ඇඳුමෙන් සැරසී 
කිසි වැඩක් පලක් නොකර 
ශාන්තව,වචනයක් කතා නොකර 
එපා වුනේ නැද්ද?"

"කට්ටිය එන යනකොට 
කට්ටිය කන බොනකොට 
කවුරුවත් නෙමේ වගේ 
ඉන්න සිදුවීම පවක් නෙමේද?"

ඔබ අසයි.

'නෑ ගානක් නෑ .
තිස් අවුරුද්දක් තිස්සේම 
මං හිටියේ එහෙම .
නිශ්චලව,ඇන ගැසූ පෙට්ටියක.
ඔබ හදිසියේ ආවට 
ගිවිසුමේ හැටි එහෙම.
නිශ්චලව උඩුබැලි අතට.
නිශ්ශබ්දව .
සමහරවිට 
මට පුරුදු එකම විදිය.
මම දන්න එකම විදිය.
ඉතින්...,
ඔබ ආපහු යන්න 
ඔබට පුරුදු තැනට.
පුරුදු අය අතරට.
මං ආයෙමත් ඉන්නම් 
ගිවිසුමේ විදියට 
නිශ්චලව,උඩුබැලි අතට.'

නීතිය කාටත් එකයි, දෙක වෙන්නේ මටයි මගෙ උන්ටයි විතරයි !!

නීතිය කාටත් එකයි, දෙක වෙන්නේ මටයි මගෙ උන්ටයි විතරයි !!

 

ඉන්දීය කොන්සල් කාර්යාලය ඉදිරිපිට නාමල් රාජපක්ෂලා පඹයින් පුච්චමින්, මාර්ග බාධක පෙරළමින් නැටූ ඩෙඟාව සහ දේශපාලන සිරකරුවන් නිදහස් කරන මෙන් ඉල්ලමින් උතුරේ ජනතාව කළ සාමකාමී විරෝධය එක තලයක පිහිටුවා 'දෙමළුන්ට ආණ්ඩුව සහනදායී ලෙස සලකන බවත් රාජපක්ෂලාට නම් එසේ නැති බවත්' කියමින් තවත් ජාතිවාදී ගිනිපුපුරක් ඇවිළවීම රාජපක්ෂ කඳවුරේ මේ මොහොතේ උපායමාර්ගය වී ඇති බව පෙනේ. රාජපක්ෂලා හම්බන්තොට නැටූ ඩෙඟාවෙන් දශමයක් හෝ උතුරේ ජනතාවට කිරීමේ හැකියාවක් එහි පවතින අර්ධ මිලිටරි පාලනයට අනුව නොහැකි බව පොඩි දරුවකු වුණත් දන්නා කාරණයකි. අනෙත් අතට උතුරේ ජනතාව එම විරෝධතාවය පළ කළේ සිරගත කරගෙන සිටින තම ඥාතීන් නිදහස් කරගැනීම උදෙසා විනා පැරණි රජ පවුලක් යළි බලයේ පිහිටුවේ යටි අරමුණක් ඇතිව නොවේ. 

මේ සියල්ල පසෙක තිබියදී කැපුවත් සිංහල බෞද්ධ පූජිත් ජයසුන්දර කරන්නේ එම උද්ඝෝෂන දෙකෙහි වෙනස්කම් මාධ්‍යයට අවධාරණය කිරීම නොවේ. ඔහු කියන්නේ කරුණු විමර්ශනය කර බලා අනිවාර්යයෙන් ම අත් අඩංගුවට ගන්නා බවය. පූජිත්ගේ කරුණු විමර්ශන ගැන අසන අපට හිනා යන්නේ දෙකොණින්ය. 

පොලිස් මූලස්ථානය තුළ දී පොලිස්පති පූජිත් ජයසුන්දර විසින් එහි විදුලි සෝපාන ක්‍රියාකරුට පහර දෙනු ලැබුවේ 2017 අප්‍රේල් 15 වනදාය. දැන් මාස හයක් ගත වී තිබේ. දැනටත් පොලිස්පති පරීක්ෂණ කරන්නේ එහි වීඩියෝව මාධ්‍ය වෙත ලැබුණු ආකාරය පිළිබඳවය. නීතිය කාටත් එක වුණාට නීතිය පූජිත් ළඟදී දෙකට වැටී ඇත. පූජිත් විසින් නීතිය දෙකට දමා ඇත. පූජිත්ව ආරක්ෂා කරන ආණ්ඩුවේ ඉහළ බලධාරීන් විසින් පූජිත් ඉදිරියේ නීතිය තුනට හතරට දමා ඇත. 

එසේම පසුගියදා හම්බන්තොට කෙරුණු විරෝධතාවයේදී අත් අඩංගුවට ගත් පුද්ගලයකුට සහකාර පොලිස් අධිකාරී තුශාර දළුවත්ත විසින් කනට ගහන අන්දම රටම දුටු නින්දිත ක්‍රියාදාමයක් විය. එහිදී ද නීතිය කාටත් එකයි කීවාට දළුවත්තට නීතිය දෙක වී තිබේ. ඔහුට මාතරට මාරුවක් ලැබී ඇතුවා පමණි. එසේම පසුගිය ජනාධිපතිවරණය ආසන්නයේදී ප්‍රේමලාල් ජයසේකර හිටපු නියෝජ්‍ය අමාත්‍යවරයා විසින් කළ මිනීමැරුමක සාක්ෂි වසන් කළ ජ්‍යේෂ්ට නියෝජ්‍ය පොලිස්පති ලලිත් ජයසිංහට අධිකරණය හමුවේ පැය කිහිපයකින් ඇප ලැබිණි. එතැනදී ද නීතිය දෙකය. පොලීසිය එකය. 

එහෙයින් පොලිස්පති පූජිත් ජයසුන්දර රටේ කාටත් එක ලෙස නීතිය ක්‍රියාත්මක කරන බව කියන විට එය හිනායන විහිළුවක් නොව අප්‍රසන්න ජුගුප්සාජනක විහිළුවකි. රටේ කාටත් නීතිය එක ලෙස ක්‍රියාත්මක කිරීමේ පළමු උදාහරණය දෙන්නට අවශ්‍ය නම් ආණ්ඩුව දැන්වත් මේ විහිළුකාර පොලිස්පති කෝලම තනතුරින් ඉවත් කර ඔහුට එරෙහිව නීතිය ක්‍රියාත්මක කළ යුතුව තිබේ. දැනටත් මාස හයක් පමා වී ඇති එම ක්‍රියාව තවත් පමා වන දිනයක් පාසා විහිළුවක් වන්නේ ආණ්ඩුව බව ආණ්ඩුවේ බලධාරීන් දැනගත යුතුය. ආණ්ඩුව කුජීත වීමත් එක් දෙයකි. ජනතාව ඉදිරියේ 'යහපාලනය' යන වචනය කුජීත වීම ඊට වඩා භයානක ප්‍රතිඵල ගෙනෙනු ඇත.

- රංජිත් නිශාන්ත 

බෙදුම්වාදී සංවිධාන එකමුතුවේ කැඳවුම්කරු ගුණදාස අමරසේකර ශූරීන්ට වචනයක්

බෙදුම්වාදී සංවිධාන එකමුතුවේ කැඳවුම්කරු ගුණදාස අමරසේකර ශූරීන්ට වචනයක්

 

අද කැටලෝනියාවේ ඇති වී ඇත්තේ අවුල් ජාලයකි. කැටලෝනියානු ජනාධිපති කාලස් පුජිමොන්ට් පසුගිය සතියේ කැටලෝනියානු ස්වෛරී රාජ්‍ය ප්‍රකාශයට පත් කළ අතර එසැණින්ම එය යළි අත්හිටුවා ලූයේය. ඒ, ස්පාඤ්ඤය සමඟ සාකච්චාමය විසඳුමකට යන බලාපොරොත්තුවෙනි. දැන් එතැන එකම අවුලකි. කුර්දිස්ථානයේ ඊටත් එහා යන ගැටුමකි. කුර්දිස්ථාන් ගැටුම බිහිකළේ සදාම් හුසේන් විසින් එහි 8,000ක ජනතාවක් ඝාතනය කිරීමෙන් අනතුරුවය. ඒ 1988දීය. එතැනින් යටපත් වී තිබුණු ගැටුම යළි ඉඩ ලද සැණින් ඇවිළිණි. පසුගිය සමයේ අයි.එස්. ත්‍රස්තවාදීන්ට එරෙහිව යුධ වැදුණු කුර්දිස්ථානයේ අද සටන් වදින්නේ පෙශ්මගා සටන් කාමීන් සහ ඉරාක හමුදා ය. එහෙත් ඓතිහාසිකව සහ විෂය මූලිකව සලකා බලන කල මේ කැටලෝනියාවට සහ කුර්දිස්ථානයට නොමැති තරම් විභවයක් බෙදී වෙන්වී යාම සඳහා ශ්‍රී ලංකාවේ උතුරු නැගෙනහිරට තිබේ. දැනට අළු යට ගිනි පුපුරු ලෙසින් පසුවන්නේ එම බෙදී වෙන් වීමේ ඉල්ලීමයි. 

ඊට එරෙහිව තීරණාත්මක සාධකය ලෙසින් පවතින්නේ ඉන්දියාවයි. අමරසේකරලා ඇතුළු හතර වරිගය වන්දනාමාන කරන ඊනියා 2009 විජයග්‍රහණය කළමනාකරණය කළේද ඉන්දියාව විසිනි. එහෙත් උතුරු නැගෙනහිර බෙදී වෙන්වීමට ඉන්දියාව තරයේ එරෙහි වන්නේ ඒ හරහා තමිල්නාඩුව තමන්ට අහිමි වීමේ අනතුරක් පවතින නිසාය. එසේ නොමැතිව ලංකාවේ උතුරු නැගෙනහිර බෙදී වෙන් නොවී පවතින්නේ අමරසේකරලාගේ වියපත් කටහඬට බියෙන් නොවේ. 

එවන් වූ මොහොතක රට දෙකඩ කරනවා වෙනුවට යම් සාධාරණ බලය බෙදීමක් මඟින් ගැටළුව සමථයකට පත් කරගැනීම සඳහා වත්මන් රජය උත්සාහ ගනිමින් සිටී. සැබැවින්ම උතුරු නැගෙනහිර ජනතාවගේ සාධාරණ ඉල්ලීම් සම්බන්ධයෙන් විසඳුමක් ලබා දීම මනුශ්‍යත්වය අගයන කාගේත් වගකීම විය යුතුය. එය වත්මන් රජයේ උත්සාහය තුළ කොතෙක් සාක්ශාත් වේදැයි කීමට අප නොදන්නා නමුත් බලය බෙදා හැරීමේ විසඳුමක් වෙනුවෙන් වන ක්‍රියාකාරීත්වය අගය කළ යුතුය. 

එහෙත් මේ මොහොතේ මහින්ද රාජපක්ෂ සහ ඔහුට න්‍යාය සම්පාදනය කරන ඊනියා ජාතික සංවිධාන වල උත්සාහය වන්නේ 'දෙමළුන්ට කිසිවක් දීමට අවශ්‍යත් නැත. දෙන්නේත් නැත' යන මතවාදය පැතිරවීමටය. ඒ හරහා බෙදී වෙන්වීම හැර තමන්ට අන් විසඳුමක් නැතැයි යන්න දෙමළ අන්තවාදී සංවිධාන වලට ඒත්තු ගැන්වීමටය. ඒ හරහා බෙදුම්වාදය අවුළුවාලීමටය. රට යළිත් ගිනි තැබීමටය. සරලව කිවහොත් අමරසේකරලා මේ ඉල්ලන්නේ 'ලේ' ය. 

ව්‍යවස්ථා සංශෝධනය සම්බන්ධයෙන් වතුර කළයේ හැකිතාක් කිඹුලන් මවමින් පොදු ජනතාව බියපත් කරන්නට දඟලන  අමරසේකරලා නම් තම ජීවිත කාලයෙන් සැලකිය යුතු කොටසක් ගෙවා අවසන් කර ඇත. ඔවුන් අද මේ විසකුරු මතවාද වපුරා හෙට පරලොව යන්නට නියමිත අතර විඳවන්නට වන්නේ ඊළඟ පරම්පරාවටය. ඒත් අමරසේකරගේ ඊළඟ පරම්පරාවට නොවේ. ජාති(ක)වාදය ජාතිආලය යන යන තැන උතුරුවන අමරසේකරගේ දරු මුණුපුරන් ජීවත් වන්නේ ඕස්ට්‍රේලියාවේය. ඒ ජාතිආලයේ ගැඹුර එහෙමය. විඳවන්නට වන්නේ මේ රටේ ජීවත්වන මතු පරම්පරාවටය. 

ගු. අමරසේකරටම හරියන නඩයකුත් සිටී. එයින් ගෙවිඳු කුමාරතුංග ප්‍රධානය. පෙර නෑකම කුමක් වුවත් දැන් නම් ගෙවිඳු යනු කුමාරතුංග මුනිදාසයන්ගේ මී මුත්තාය. මන්දයත් සිය විශිෂ්ට චින්තනයත් සමඟ මුනිදාසයන් ජීවත්වූයේ 21 වන ශතවර්ෂයේ නිසාය. එහෙත් ගෙවිඳු කුමාරතුංග ඒ පරපුරේ උරුමය ගෙනියනවා වෙනුවට අද ජීවත්වන්නේ 16 වන ශතවර්ෂයේ පසුගාමී චින්තනය සමඟ නිසාය. 

සාහිත්‍යධරයෙක් වශයෙන් ගුණදාස අමරසේකර මියගියේ 1970 ගණන්වල අබුද්දස්ස යුගයක් ලිවීමත් සමඟය. දැන් මේ දඟලන්නේ ඔහුගේ අවතාරය ය. එහෙයින් රටේ ජනතාවගේ මූලිකම ප්‍රශ්නයට යම් පමණක් හෝ විසඳුමක්, විසඳුම් ප්‍රවේශයක් ලබා දීමේ උත්සාහයට බාල්දි දමා ඩ්‍රැකියුලාවන් මෙන් ලේ රසට කෙළ පෙරනවා වෙනුවට දැන් අමරසේකරයන්ට ඇත්තේ යන්නට ම යන්නටය. කෙටියෙන් කියන්නේ නම් අමරසේකර ශූරීනි, "ඇති හිටියා!" ය. 


- රංජිත් නිශාන්ත